Соопштенија
alt
Младите имаат капацитет да ја преземат одговорноста за иднината на татковината – средба со лидерите на партиските подмладоци
Петок, 22 Јули 2011

Претседателот на Република Македонија д-р Ѓорге Иванов денеска во Охрид по втор пат ги прими лидерите на младинските организации на политичките партии, кои присуствуваа на првата средба со Претседателот во пресрет на предвремените парламентарни избори, одржани во јуни 2011.

Иницијативата за повторно среќавање беше покрената уште при првиот разговор, кога Претседателот Иванов ги повика младите лидери да го развиваат политичкиот дијалог и активно да придонесат во спроведувањето фер, демократски и мирни избори без насилство и изборни инциденти.

Целта на втората средба со претставниците на партиските подмладоци беше, пред сè, да се даде заедничка оценка за начинот на кој беа спроведени изборите и како младите политички лидери придонесоа кон нивната успешност. Тие на Претседателот Иванов му ги презентираа своите искуства од текот на предизборната кампања, предизвиците со кои се соочувале на терен, како и нивниот општ впечаток за изборниот процес.

„Во демократијата изборите доаѓаат и поминуваат, и тие ги легитимираат оние кои ја преземаат одговорноста за државата. Сите ние треба да учествуваме во афирмирање и промовирање на Република Македонија како држава во која живеат и дејствуваат квалитетни, талентирани и кадарни млади луѓе, кои поседуваат голем капацитет и потенцијал и кои се спремни да ја преземат одговорноста за иднината на својата татковина во свои раце со практикување на јавна пристојност,“ изјави Претседателот Иванов. Тој воедно нагласи дека младата и отворена политичка мисла, која стреми кон подобрувања и промени клучни за демократската и политичка стабилност и развој на Република Македонија, секогаш ќе ја има неговата полна поддршка.

Имајќи ја предвид потребата за континуирано зацврстување на јавната и политичка свест кај младите, Претседателот Иванов уште еднаш ја нагласи отвореноста овие средби да прераснат во традиција, кога самите подмладоци ќе ја преземат обврската да имаат редовни меѓусебни средби.
 

alt
Прием на група претставници на семејства на лица исчезнати во воениот конфликт во 2001 година
Четврток, 21 Јули 2011
alt
Писмо до Претседателот Саркози по повод Националниот празник на Француската Република
Четврток, 14 Јули 2011

По повод 14 јули - Денот на Бастиља, Националниот празник на Француската Република, Претседателот на Република Македонија д-р Ѓорге Иванов испрати писмо до Претседателот на Француската Република, Никола Саркози.

Почитуван господине Претседателе,

По повод Денот на Бастиља, Националниот празник на Француската Република, во името на граѓаните на Република Македонија и во свое лично име, Вам лично и на сите граѓани на Вашата земја, Ви упатувам најсрдечни честитки и искрени желби за просперитет на Вашата земја и за благосостојба на пријателскиот народ на Франција.

Важноста на 14 јули 1789 година, за Франција, но и за Европа и светот е голема. Тоа е славење на идеалите на Француската револуција - слобода, еднаквост, братство, како и идеалите зацртани во Декларацијата за правата на човекот и граѓанинот - слободата, правото на сопственост, безбедност, правото на борба против угнетувањето. Идеали кои во континуитет претставуваат инспирација за луѓето и народите ширум светот во својот стремеж за остварување на природните права на човекот. Идеали кои пред две децении ги исполни и Република Македонија.

Дозволете ми да ја искористам оваа свечена пригода да изразам задоволство од досегашниот развој на односите кои се развиваат и надградуваат во духот на заедничките заложби за демократска, стабилна, обединета и просперитетна Европа.

Сеќавајќи се на визионерските зборови на големиот Французин и Европеец, Жан Моне - „да се гради Европа значи да се гради мир“ - сакам да Ве уверам, господине Претседателе, дека Република Македонија и нејзините граѓани остануваат посветени за исполнување на вековниот сон за европска и евроатлантска Македонија. Би сакал да ја искористам оваа свечена прилика да искажам благодарност за поддршката која Вашата земја и ја дава на Република Македонија во оваа насока, како и да ја истакнам длабоката увереност и очекувањето дека истата ќе продолжи и во претстојниот период.

Со такво уверување и со најискрени желби за Ваша натамошна успешна работа, добро здравје и лична среќа, Ви ги упатувам изразите на моето највисоко почитување.

Д-р Ѓорге Иванов
 

alt
Претседателот Иванов се сретна со организаторите на Охридско лето
Понеделник, 11 Јули 2011

Претседателот на Република Македонија д-р Ѓорге Иванов денес во Вила Билјана во Охрид ги прими организаторите и дел од учесниците на годинешното Охридско лето.

На средбата, организаторите на фестивалот го информираа Претседателот, кој е и покровител на фестивалот, за досегашниот тек на подготовките. Претседателот Иванов изрази надеж дека фестивалот Охридско лето 2011 година ќе биде успешен културен настан, со учество на голем број странски уметници од кои многумина за првпат настапуваат во Охрид. Според Претседателот Иванов, фестивалот Охридско лето дава исклучителен придонес за промовирање на македонската култура во светот, како и на најзначајните светски културни достигнувања пред македонската публика. Претседателот Иванов минатата година додели Орден за заслуги за Македонија на фестивалот Охридско лето, поради долгогодишното успешно претставување на македонското и светското музичко и културно творештво на оваа национална установа.

Фестивалот ќе биде отворен утре, со премиера на делото Триологија Романа. На свеченото отворање, како гости на Претседателот Иванов ќе присуствуваат и Претседателите на Албанија, Косово и на Црна Гора.

alt
Средба со учесниците на Семинарот за македонски јазик, литература и културa
Сабота, 09 Јули 2011

Претседателот на Република Македонија д-р Ѓорге Иванов денес  ја прими делегацијата на учесници на Семинарот за македонски јазик, литература и култура кој годинава од 27 јуни до 12 јули по 44-ти пат традиционално се одржува во Охрид, во организација на Универзитетот Св. Кирил и Методиј од Скопје. Годинава на Семинарот за македонски јазик, литература и култура присуствуваат 112 учесници од 24 земји.

На средбата, Претседателот Иванов го подвлече значењето на Семинарот за македонски јазик, литература и култура кој повеќе од четири децении претставува духовна крепост на македонскиот културен и национален идентитет. Благодарение на овој настан  македонскиот јазик и македонската литература и култура се распространува низ сите светски меридијани создавајќи свои пријатели и почитувачи. Честитајќи им на организаторите за посветеноста при организирањето и реализирањето на семинарот претседателот Иванов им  посака и во иднина семинарот да продолжи со својата мисија и постојано развивајќи и наградувајќи ги своите содржини  ревносно да го промовира  македонскиот јазик и култура.

Гостите подробно го информираа Претседателот за годинешната програма и се заблагодарија за неговата поддршка изразувајќи цврста заложба и понатаму да бидат промотори на македонскиот јазичен и културен идентитет. Тие исто така го информираа Претседателот дека по завршувањето на семинарот ќе следи и меѓународната научна конференција на која ќе присуствуваат 80 учесници.
 

alt
Претседателот Иванов се сретна со учесниците на Специјалната олимпијада
Петок, 08 Јули 2011

Претседателот на Република Македонија д-р Ѓорге Иванов денеска ја прими делегацијата на Специјална Олимпијада на Македонија, која учествуваше на Олимписките Летни Игри на Специјална Олимпијада одржани од 25 јуни до 4 јули во Атина, Грција.

Повод за средбата беше извонредниот настап на македонските спортисти на Летните Олимписки игри во Атина на кои македонските спортисти постигнаа одличен успех со освојувањето на три златни и три бронзени медали, и тоа во неколку спортови: пливање, атлетика и пинг понг.

На средбата, Претседателот Иванов им го честита успехот на членовите на македонската Специјална Олимпијада и го пренесе своето високо почитување на нивната работата, истакнувајќи дека особено ги подржува активностите поврзани со лицата со посебни потреби. Токму спортот е еден од најуспешните начини за интеграција и социјализација на лицата со посебни потреби. Оттука севкупните активностите на Специјалната Олимпијада, а особено настапите на меѓународните спортски манифестации се од извонредно значење. Благодарение на успесите на спортистите на Специјалната Олимпијада, се промовира и нашата земја и нашата култура, истакна претседателот Иванов.

Претставниците на Специјалната Олимпијада го информираа за моментните активности, како и за плановите во иднина и учеството наголемите интернационални манифестации кои следат, изразувајќи цврста заложба и понатаму да бидат компетативни и да постигнуваат врвни резултати.
 

 
Почеток < Пред 151 152 153 154 155 156 157 158 159 160 Следно > Крај
Страница 152 од 170