Соопштенија
Средба со претседателот на Владата на Црна Гора Мило Ѓукановиќ
Петок, 22 Октомври 2010

Претседателот на Република Македонија д-р Ѓорге Иванов денеска го прими претседателот на Владата на Црна Гора, г-дин Мило Ѓукановиќ.

На средбата беше констатирано искреното пријателство и високото ниво во односите меѓу двете земји, кои во континуитет бележат позитивен развој, за што потврдуваат и оваа посета на премиерот Ѓукановиќ на Република Македонија и претстојната посета на Претседателот Иванов на Црна Гора која ќе се реализира во почетокот на ноември оваа година.
Претседателот Иванов подвлече дека токму политичкиот дијалог, кој што е континуиран и се остварува на сите нивоа, претставува голем капитал кој во наредниот период треба да се зголемува, особено во сферата на економската соработка.

На средбата се разговараше и се истакна задоволството за денеска потпишаните билатерални спогодби со кои уште еднаш се потврди блиската соработка на двете земји како на економско поле, така и на полето на политичкиот дијалог.

Претседателот Иванов и премиерот Ѓукановиќ разменија мислења за понатамошна соработка и развивање на прашањата за соработка на регионален и мултилатерален план, соработката за НАТО и ЕУ интеграцијата на двете земји. Двајцата соговорници констатираа дека Македонија и Црна Гора, споделувајќи идентична визија за интеграцијата во евро-атлантските структури, се посветени на регионалната соработка и на градењето на добрососедски односи и во таа насока се согласија за натамошна взаемна поддршка во интегративните процеси.

Средба со Претседателот на Европскиот совет Херман Ван Ромпуј
Вторник, 19 Октомври 2010

Претседателот на Република Македонија д-р Ѓорге Иванов денеска го прими Претседателот на Европскиот совет Херман Ван Ромпуј.

На средбата се разговараше за односите меѓу Република Македонија и Европската Унија, за актуелностите во процесот кои се води под покровителство на ОН за разликите околу името, а беа разменети и мислења и информации за состојбите во рамките на Унијата како и состојбите во регионот на Југоисточна Европа.

Претседателот Иванов нагласи дека посетата на Претседателот на Европскиот совет Херман Ван Ромпуј претставува значаен сигнал на поддршка на проширувањето како една од најуспешните политики на ЕУ за ширење на областа на безбедност и просперитет во Европа.

Претседателот Иванов нагласи дека фокусот на Република Македонија останува на двата главни колосека: ефикасно спроведување на реформите и максимализирање на напорите за надминување на наметнатиот проблем со името под покровителство на ОН. Претседателот Иванов апелираше Република Македонија да има еднаков третман како други земји кандидати, потенцирајќи го успешниот пример на паралелно движење во интеграциите и во разрешувањето на билатералните проблеми помеѓу Република Словенија и Република Хрватска.

На интерес на соговорникот, претседателот Иванов ја елаборираше актуелната состојба во регионот и нагласи дека европската идеја е таа која ги движи сите општества кон просперитет и ги упатува сите земји во регионот кон  тесна соработка гледајќи едни на други како партнери и поддржувачи во овој историски проект.

Претседателот на Европскиот Совет Ромпуј изрази благодарност за мошне конструктивната и корисна размена на информации и видувања на наведените теми, а изрази  и задоволство од сериозните зафати во реформските процеси кои ги превзема Република Македонија кои се од суштинско значење за европската перспектива на земјата. Ромпуј нагласи дека неговата посета е со две клучни поенти да апелира за продолжување на напорите за изнаоѓање на заемно прифатливо решение за надминување на спорот со Грција и во тој контекст упати честитки и благодарност за ангажманот на претседателот Иванов. Претседателот на Европскиот совет  Ромпуј повика на продолжување на реформскиот процес и се заблагодари за улогата и активностите на претседателот Иванов во унапредувањето на регионалната соработка и добрососедските односи.

Честитка по повод 11 Октомври - Денот на вооруженото востание во Република Македонија
Понеделник, 11 Октомври 2010

Претседателот на Република Македонија д-р Ѓорге Иванов по повод 11 Октомври - Денот на вооруженото востание во Република Македонија упати честитка до граѓаните на Република Македонија.

Почитувани граѓани,

Денеска со особена гордост го прославуваме денот на народното востание 11 Октомври. Пред 69 години кревајќи се против фашистичката оска на злото преку вооружено востание македонските граѓани уште еднаш ги потврдија своите слободарски традиции. Кревајќи се против фашизмот македонските борци застанаа рамо до рамо со сиот правдољубив и демократски свет. Благодарение на 11 Октомври и на долгата и макотрпна борба која следеше се удрија темелите на независна Македонија што беше потврдено и со Првото Заседание на АСНОМ.

Прославата на 11 октомври е уште една можност да се присетиме и да им се заблагодариме на сите херои од генерациите пред нас, кои без колебање ги дале своите животи за граѓаните на Република Македонија денес да живеат слободно и да можат да ја градат својата иднина и својот просперитет.

Припомнувајќи си на борбата во минатото и слободарските традиции токму на овој празник потсетуваме дека Македонија, била, е и секогаш ќе биде на страната на прогресот, демократијата и слободата. Оттука нашето членство и припадноста во НАТО и Европската Унија е сосема природно и заслужено.

Почитувани граѓани, Ви го честитам празникот.
За многу години демократска, слободна и суверена Република Македонија!

д-р Ѓорге Иванов

Средба со експертска делегација на ГАЗПРОМ
Петок, 01 Октомври 2010

Претседателот на Република Македонија д-р Ѓорге Иванов денеска прими претставници на експертска делегација од руската компанија ГАЗПРОМ.

На средбата на која присуствуваше и заменик претседателот на Владата на Република Македонија и министер за финансии г-дин Зоран Ставрески се разговараше за унапредување на соработката меѓу Македонија и Русија во енергетскиот сектор, како и за условите за вклучување на Република Македонија во меѓународниот енергетски коридор „Јужен поток“, со можност за изградба на крак низ територијата на Македонија.

Претставниците на експертската делегација на руската компанија ГАЗПРОМ изразија задоволство од изградбата на гасоводната мрежа во Република Македонија, за што искажаа целосна подотвеност за соработка и го информираа Претседателот Иванов за агендата на нивната посета на Република Македонија чија цел е утврдување на условите за почеток на овој проект.

Претседателот Иванов ја искажа политичката подготвеност и поддршка на Република Македонија за реализација на овој проект кој ќе обезбеди енергетска стабилност на Република Македонија во следните децении и изрази уверување дека се создадени услови ГАЗПРОМ да учествува во изградбата на гасоводната мрежа во Република Македонија, за што двете страни искажаа целосна подотвеност за соработка.

Средбата на Претседателот Иванов со експертската делегација од ГАЗПРОМ следува после посетата на Претседателот Иванов и вицепремиерот Ставрески на Руската Федерација реализирана во јуни оваа година кога беше потпишан договор за клириншкиот долг, а беше и остварена средба со генералниот директор на ГАЗПРОМ, г-дин Алексеј Милер.

Новонаименуваниот амбасадор на Кралството Шведска Ларс Валунд ги предаде акредитивните писма
Петок, 01 Октомври 2010

Претседателот на Република Македонија д-р Ѓорге Иванов денеска ги прими акредитивните писма на новонаименуваниот амбасадор на Кралството Шведска во Република Македонија Н.Е. г-дин Ларс Валунд.

Новонаименуваниот амбасадор на Шведска истакна дека односите меѓу двете земји се одлични и сеопфатни и дека за време на неговиот мандат ќе направи се што е во негова моќ за натамошно зајакнување на односите и продлабочување на соработката.
Повеќе граѓани од Македонија живеат во Шведска и даваат значаен придонес во нашето општество. Во мојот мандат ќе работам на продлабочување на нашите односи во делот на културата и стопанството, рече шведскиот амбасадор.
Амбасадорот Валунд подвлече дека шведската поддршка за Македонија е силна уште од самите почетоци и додаде дека доказ за тоа е шведскиот суштински придонес во мировната мисија на ОН, УНПРЕДЕП во 90-те години.
Шведска е силен поддржувач на македонските интеграции во евро-атлантските заедници. Шведска смета дека е од суштинско значење Македонија да ги почне преговорите со ЕУ за членство што е можно поскоро кога ќе бидат исполнети условите за тоа, изјави амбасадорот Валунд и додаде дека проширувањето на ЕУ е клучно за реформите и модернизација на  општествата во Југоисточна Европа како и за обезбедување и зачувување на стабилноста во овој регион.

Претседателот Иванов посакувајќи му искрено добредојде и успешно водење на оваа високо ценета мисија на амбасадорот Валунд, изрази задоволство од досегашниот развој на односите на пријателство меѓу двете земји и истакна дека Република Македонија е целосно посветена на натамошниот развој на односите и соработката со Кралството Шведска.
Уверен сум дека Шведска, како влијателен член на Европската Унија која ја поддржува политиката на "отворени врати" и во иднина ќе ја помага Република Македонија во нејзините напори за интеграција во европското семејство, како што го направи тоа за време на минатогодишното претседавање, рече Претседателот Иванов.
Македонскиот претседател подвлече дека за Република Македонија процесот на евро и евроатлантска интеграција, преставуваше и претставува еден од клучните интегрирачки фактори и двигател на реформските процеси, поради што ужива апсолутен политички, етнички и социјален консензус.
Прогресот на Република Македонија во тој процес, беше препознат и признат од страна на Европската Комисија, потенцираше претседателот Иванов и нагласи дека отпочнувањето на пристапните преговори за Република Македонија, не само што ќе го потврди кредибилитетот на Унијата и ќе има дополнителен мотивирачки ефект во Република Македонија, туку ќе има и позитивни импликации на стабилноста и просперитетот на целиот регион.

Честитка на Претседателот на Република Македонија д-р Ѓорге Иванов по повод 8 септември, Денот на независноста
Среда, 08 Септември 2010

Почитувани граѓани, драги пријатели
Годинешниот празник ни е уште една можност да се потсетиме на сите напори, успеси, тешкотии и активности кои ги изминавме во градењето на нашата држава – Република Македонија. Денес се сеќаваме на почетокот на патот кој беше одбележан со големи закани и со неизвесност, на кој наше најголемо оружје беше решителноста и ентузијазмот на граѓаните кои ја преземаа одговорноста во свои раце. 8 септември е еден во низата решителни чекори преземани со цел да се даде форма и да се отелотвори токму оваа решителност на нашите граѓани да бидат одговорни за својата иднина. Причина повеќе за празнување е што темелите на таа наша држава ги поставивме цврсто во вредностите кои ја гарантираат нејзината долговечност, во демократскиот плурализам, почитувањето на човековите права и заштитата на слободата на сите наши граѓани.
Сите ние кои празнуваме, во Република Македонија како и во големите заедници на македонските граѓани во светот, имаме свој залог во иднината на македонската држава. Како што решително се определивме таа иднина да ја бараме во независна и самостојна држава, еднакво решително сме определени таа држава да го одбележи своето место во обединета Европа. Нашата безбедност која ја зачувавме во бурните први денови на независноста, во иднина ја проектираме во евро-атланскиот сојуз на демократски и слободољубиви држави.
На неизвесниот пат кој го поминавме паметиме мигови кога можеби сме се посомневале во крајниот исход и во успешноста на задачата која ја преземавме. Кога можеби и не сме биле достојни на висината на задачата која е пред нас – да се изгради нова држава, нов дом, на Балканот и во Европа. Но, убеден сум дека сите овие прашања добија решителен одговор – дека основата е поставена, и дека Македонија е тука за да опстои, за да им обезбеди можност за напредок и за благосостојба, како и шанса за докажување на сите нејзини граѓани.

 
Почеток < Пред 151 152 153 154 155 156 157 Следно > Крај
Страница 152 од 157