Соопштенија
PRM_portret_nov
Честитка од претседателот Иванов по повод 11 Октомври - Денот на народното востание
Среда, 11 Октомври 2017

Претседателот на Република Македонија, д-р Ѓорге Иванов, по повод 11 Октомври - Денот на народното востание, упати честитка до граѓаните на Република Македонија.

Почитувани граѓани на Република Македонија,

На 11 октомври 1941, пред точно 76 години, Македонија го избра патот на борба против најголемите зла во историјата на човештвото – фашизмот и нацизмот. Свесен дека вистинската слобода за Македонија не може да биде измолена и подарена, туку само со борба освоена, македонскиот народот заедно со сите чеда на Македонија ја започна Народноослободителната борба. Во оваа борба, народот на Македонија се препороди и се почувствува слободен да си ја земе судбината во сопствените раце.

На овој ден се потсетуваме на нашите партизани кои чекорејќи по патот кон слободата се соочија со многу маки и премрежија, и притоа покажаа невиден хероизам и искрен патриотизам. На овој тежок пат, тие се водеа од три вредности – слободата, правдата и човечноста кои ги вградија во темелите на македонската држава. Нашите славни предци во наследство ни ја оставија скапо платената слобода и државност на Република Македонија. Наша должност е да ја сакаме, чуваме и унапредуваме, за да им ја предадеме на нашите потомци.

Затоа, да останеме верни на македонската традиција на соживот и почитување на различноста. Да вложуваме во довербата и во почитта што го држат нашето општество сплотено. Да продолжиме да градиме демократска, просперитетна и европска Република Македонија. И притоа, постојано да ги имаме на ум вредностите кои нè движат и како луѓе и како општество, а тоа се слободата, правдата и човечноста.

Нека ни е честит 11 Октомври, Денот на народното востание Македонија!

Да живее Република Македонија!

PRM_Aselborn
Средба на претседателот Иванов со МНР на Луксембург, г. Жан Аселборн
Среда, 04 Октомври 2017

Претседателот на Република Македонија, д-р Ѓорге Иванов, денеска го прими министерот за надворешни и европски работи на Големото Војводство на Луксембург, г. Жан Аселборн.

Претседателот Иванов изрази задоволство од пријателските односи меѓу Република Македонија и Големото Војводство на Луксембург и ја посочи потребата од јакнење на севкупните билатерални односи и меѓусебната соработка. Во таа насока, македонскиот претседател ја потенцираше важноста од унапредување на политичкиот дијалог на високо ниво и искористување на потенцијалните можности за развој на економската соработка.

На средбата беа разменети мислења и информации во однос на македонските перспективи за членство во Европската унија и НАТО. Претседателот Иванов се заблагодари за приниципиелната поддршка од Луксембург, при што двајцата соговорници се согласија за неопходноста од динамизирање на евроатлантските процеси на Република Македонија и продолжување на политиката за натамошно проширување на ЕУ и НАТО.

Претседателот Иванов и министерот Аселборн разменија мислења за состојбите во регионот и актуелните предизвици со кои се соочува Европа и Европската унија. Во контекст на мигрантската криза и се поголемите безбедносни предизвици со кои се соочува европскиот континент, македонскиот претседател ја потенцираше потребата од интензивирање и унапредување на безбедносната билатерална соработка во европски и светски рамки.

Zanier_PRM
Средба на претседателот Иванов со Високиот комесар на ОБСЕ за национални малцинства, г. Ламберто Заниер
Вторник, 03 Октомври 2017

Претседателот на Република Македонија, д-р Ѓорге Иванов, денеска го прими Високиот комесар на ОБСЕ за национални малцинства, г. Ламберто Заниер.

Претседателот Иванов истакна дека Република Македонија придава големо значење на правата на малцинствата и претставува успешен и позитивен пример во регионот со својот пристап кон градење на односи на почитување и соработка меѓу различните етнички заедници.

На средбата се разговараше за ангажманот и поддршката на ОБСЕ за унапредување на меѓуетничките односи во Република Македонија, при што претседателот Иванов посочи дека со доследно почитување на Уставот и законите ќе се овозможи јакнење на меѓуетничката доверба. „За сите прашања поврзани со правата на националните малцинства, мора да се земе предвид мултиетничкиот карактер на државата и да се избегнуваат политики и интервенции кои фаворизираат само една малцинска група", порача македонскиот претседател на средбата со високиот комесар на ОБСЕ.

Во пресрет на претстојните локални избори, претседателот Иванов истакна дека е од особено значење изборниот процес да биде праведен, фер и демократски, согласно сите меѓународни стандарди и го поздрави присуството и набљудувачката улога на ОБСЕ/ОДИХР. „Очекувам македонските институции повторно да ја покажат својата зрелост и да овозможат волјата на граѓаните на Македонија да го одреди исходот од следните избори", порача македонскиот претседател.

Соговорниците разменија мислење за долгогодишната соработка со ОБСЕ и нивната поддршка на реформите на Република Македонија во сферата на владеењето на правото, судството, изборното законодавство и децентрализацијата.

PRM
Честитка од претседателот Иванов по повод Меѓународниот ден на Бошњаците
Четврток, 28 Септември 2017

Претседателот на Република Македонија, д-р Ѓорге Иванов, по повод 28 Септември, Меѓународниот ден на Бошњаците, упати честитка до припадниците на бошњачката заедница во Република Македонија.

Почитувани сограѓани,

Во мое име и во името на сите граѓани на Република Македонија, би сакал најсрдечно да ви го честитам 28 Септември, Меѓународниот ден на Бошњаците, и да ви посакам добро здравје, успех и благосостојба.

Како и речиси сите балкански држави, и Македонија во еден период од историјата беше дел од Османлиската Империја. Но, за разлика од речиси сите други балкански држави, Македонија не го отфрли, туку го прегрна најдоброто и највредното од ова наследство, а тоа е моделот на соживот, почитување и прифаќање на различноста. Празнувањето на 28 Септември – Меѓународниот ден на Бошњаците е симболичен израз на длабоката и реална почит што Република Македонија ја има за своите граѓани кои се дел од бошњачката заедница.

Со сета своја културна, јазична и религиска различност, бошњачката заедница го збогатува македонското мултиетничко општество. Делата со кои придонесувате кон демократскиот и економскиот напредок и промовирањето на нашата заедничка татковина се најдобар доказ дека вие, Бошњаците, сте лојални граѓани на Македонија. Со сето тоа, вие придонесувате кон градењето на меѓусебната доверба во нашето општество, која ни е потребна повеќе од кога и да било порано.

Затоа, наш завет е и во иднина да продолжиме да градиме мостови на пријателства и заедно да чекориме кон заедничката европска иднина на Република Македонија.

Нека ви е честит големиот празник.

д-р Ѓорге Иванов

PRM_Glover
Средба со шефот на Мисијата на ОБСЕ/ОДИХР за набљудување на локалните избори во Р. Македонија, г-ѓа Одри Гловер
Петок, 22 Септември 2017

Претседателот на Република Македонија, д-р Ѓорге Иванов, денеска оствари средба со амбасадорот  г-ѓа Одри Гловер, шеф на Мисијата на ОБСЕ/ОДИХР за набљудување на локалните избори во Република Македонија.

На средбата, претседателот Иванов истакна дека сите институции инволвирани во изборниот процес, вклучително и политички партии треба да придонесат во спроведувањето на фер и демократски избори, преку безусловно почитување на законските прописи и во согласност со достигнатите демократски придобивки и европските стандарди, водејќи сметка за државните и за интересите на граѓаните.

„Очекувам, како и секогаш досега, изборниот процес да помине во најдобар ред и во демократска атмосфера, но морам да истакнам дека сите учесници во изборниот процес носат политичка одговорност и должност да ги почитуваат изборните правила и закони", потеницираше претседателот Иванов.

Посочувајќи дека спроведувањето на изборниот процес е еден од клучните критериуми за исполнување на стратешките цели на Република Македонија, претседателот Иванов изрази очекување дека изборниот натпревар ќе биде регуларен и конструктивен и ќе претставува борба на предлози и идеи, а не само борба за локална власт.

Шефот на набљудувачката мисија на ОБСЕ го запозна претседателот Иванов со нивните претстојни активности поврзани со изборниот процес.Македонскиот претседател изрази очекување дека набљудувачката мисија на ОБСЕ/ОДИХР, како и досега, професионално ќе ја извршува својата задача во рамките на својот строго утврден мандат.

PRM_socustvo
Сочувство од претседателот Иванов по повод катастрофалниот земјотрес во Мексико
Среда, 20 Септември 2017

Претседателот на Република Македонија, д-р Ѓорге Иванов, упати писмо со сочувство до претседателот на Соединетите Мексикански Држави, г. Енрике Пења Нието, по повод катастрофалниот земјотрес во централниот дел на Мексико.

Почитуван господине Претседател,

Со големо жалење ги примив вестите за катастрофалниот земјотрес и длабоко жалам за загубените животи, за човечките страдања и големите штети од оваа катастрофа.

Нема соодветни зборови кои ќе ја намалат Вашата, и тагата на граѓаните на Соединетите Мексикански Држави, но дозволете ми во името на граѓаните на Република Македонија и во свое лично име да Ви упатам изрази на мое најискрено сочувство. Сигурен сум, господине Претседател, дека со Вашето лидерство, Соединетите Мексикански Држави брзо ќе ги надминат последиците од оваа природна катастрофа.

Примете ги, Ваша Екселенцијо, изразите на моето највисоко почитување.

д-р Ѓорге Иванов

 
Почеток < Пред 1 2 3 4 5 6 7 8 9 10 Следно > Крај
Страница 7 од 157