Соопштенија
MNR_Grcija
Средба на претседателот Иванов со г. Никос Коѕиас, министер за надворешни работи на Република Грција
Четврток, 31 Август 2017

Претседателот на Република Македонија, д-р Ѓорге Иванов, денеска го прими г. Никос Коѕиас, министер за надворешни работи на Република Грција, кој престојува во посета на Република Македонија.

На средбата беа разменети мислења за севкупните билатерални односи меѓу Република Македонија и Република Грција.

Претседателот Иванов ја поздрави денешната посета на министерот Коѕиас на Република Македонија, како продолжение на досегашниот дијалог на министерско ниво и апелираше за забрзување на процесот на имплементација на мерките за градење доверба, преку внесување на нови содржини во билатералната соработка и предлагање на дополнителни мерки.

„Најголемата мерка која ќе влијае на меѓусебната доверба и ќе создаде уште подобра атмосфера е ако Грција ги деблокира евроатлантските процеси на Република Македонија и овозможи да не ѝ се ускратува правото на просперитет", истакна на средбата претседателот Иванов.

Интензивирањето на севкупната соработка меѓу двете земји ќе придонесе во создавањето на позитивна клима, што е неопходно за надминување на билатералната разлика околу името, оцени претседателот Иванов на средбата со грчкиот министер за надворешни работи.

Македонскиот претседател го реафирмираше интересот на Република Македонија за одржување на политичкиот дијалог на највисоко ниво. Во таа насока, претседателот Иванов изрази надеж за средба со претседателот Прокопис, и покрај неговите чести критики кон Република Македонија, и изрази очекување дека реториката во иднина ќе биде поумерена со цел унапредување на добрососедските односи во духот на европските вредности и стандарди.

Во таа насока, претседателот Иванов изрази очекување дека грчкиот премиер ќе учествува на самитот на Брдо-Бриони Процесот, чиј домаќин идната година ќе биде претседателот Иванов. „Минатиот период имав можност во повеќе наврати да разговарам со премиерот Ципрас и очекувам таа позитивна динамика на комуникација и соработка, особено за време на мигрантската криза, да продолжи и во наредниот период, како билатерално, така и во однос на проектите од регионално значење", порача претседателот Иванов на средбата.

Двајцата соговорници разменија мислења околу можниот развој на мигрантската криза во идниот период, при што претседателот Иванов изрази подготвеност за продлабочување на соработката меѓу разузнавањето и полициските служби, во подршка на регионалната безбедност за заедничките закани и степенот на закана од илегалната миграција.

PRM_n_portret
Честитка од претседателот Иванов по повод големиот христијански празник Успение на Пресвета Богородица
Недела, 27 Август 2017

Претседателот на Република Македонија, д-р Ѓорге Иванов, по повод големиот христијански празник Успение на Пресвета Богородица, упати честитка до поглаварот на Македонската православна црква - Охридска архиепископија, Архиепископот охридски и македонски г.г. Стефан и до сите верници од православна вероисповед.

Ваше Блаженство,

Дозволете ми, Вам лично, на сите верници од православна вероисповед, на членовите на Светиот архијерејски синод, на преподобното свештенство и монаштво, да упатам искрени честитки по повод големиот христијански празник – Успение на Пресвета Богородица и да Ви посакам во добро здравје, радост и среќа да ги поминете празничните денови.

Веќе два милениумa, христијаните ја сметаат Богородица за благословената меѓу жените, преку која Бог се отелотвори и стана човек. Овој голем епитет го добила поради нејзината понизност, трпеливост и безрезервна мајчинска љубов. Во нашиот современ модерен свет во кој понизноста сè почесто се заменува со горделивост, трпеливоста со нетрпение, а љубовта со индиферентност, треба да се угледаме на Богородица, да живееме со подготвеност да си помагаме. Нека овој празник на Мајката Божја нè охрабри да се стремиме за слога, почитување и разбирање на сите граѓани на Република Македонија.

Да ни е честит празникот и за многу години.

д-р Ѓорге Иванов

Egipet23082017
Проштална средба со амбасадорот на Арапската Република Египет, Н.Е. г-ѓа Манал Џеина Ел Шинави
Среда, 23 Август 2017

Претседателот на Република Македонија, д-р Ѓорге Иванов, денеска во Вила Билјана во Охрид на проштална средба ја прими Н.Е. г-ѓа Манал Џеина Ел Шинави, амбасадор на Арапската Република Египет за Република Македонија.

На средбата беа разменети мислења за севкупните билатерални односи меѓу Република Македонија и Арапската Република Египет, кои според двајцата соговорници се развиваат во духот на пријателството, меѓусебното разбирање и почитување. Во тој контекст, претседателот Иванов изрази задоволство од континуираниот дијалог и соработка на највисоко ниво меѓу двете земји.

Претседателот Иванов и амбасадорот Ел Шинави ја нагласија потребата од натамошно продлабочување на соработката на безбедносните служби на двете земји, со цел соочување со глобалните предизвици.

Амбасадорот Ел Шинави изрази задоволство од извршувањето на дипломатската должност во Република Македонија и го изрази уверувањето дека нејзината земја ќе продолжи со напорите за унапредување на односите со Република Македонија.

Претседателот Иванов се заблагодари за севкупниот ангажман на амбасадорот Ел Шинави и ѝ посака успех во идните ангажмани.

PRMportret
Писмо со сочувство до шпанскиот крал Фелипе VI по повод терористичкиот акт во Барселона
Петок, 18 Август 2017

Претседателот на Република Македонија, д-р Ѓорге Иванов, испрати писмо со сочувство до Неговото Величество, Фелипе VI, Крал на Кралството Шпанија, по повод терористичкиот акт во Барселона.

Ваше Величество,

Со шок и огорченост ја примив веста за бруталниот терористички акт во Барселона во кој животот го загубија недолжни шпански и странски државјани, а голем број се здобија со тешки повреди и трауми од ужасниот напад. Вознемиреноста од оваа жална вест е уште поголема поради тоа што и граѓанин на Република Македонија е меѓу тешко повредените лица од истиот крвнички акт.

Во овие тешки моменти на огромна жалост, дозволете ми, од името на граѓаните на Република Македонија и од мое лично име, да Ви упатам изрази на најискрено и длабоко сочувство.

Република Македонија најостро ги осудува ваквите подли акти на насилство врз невини луѓе и изразува сочувство и солидарност со земјите кои се погодени од ваквиот грозоморени кукавички чин на тероризам. Ова е глобално зло со кое сите имаме обврска да се бориме, имаме одговорност да го превенираме, спречуваме и искорениме за да не страдаат недолжни и невини животи. Ваквиот ужасен настан е потсетување дека мораме да вложуваме колективни напори за спречување на сите форми на насилен екстремизам и тероризам, и да не дозволиме нашите вредности, демократијата и слободата, да бидат мета на заканите и ризиците од тероризам, страв и омраза.

Ваше Величество, нашите мисли и молитви се со Вас и со семејствата на жртвите и настраданите.

д-р Ѓорге Иванов

prostalna_Spanija
Проштална средба со амбасадорот на Кралството Шпанија, Н.Е. г. Рамон Абароа Каранс
Петок, 18 Август 2017

Претседателот на Република Македонија, д-р Ѓорге Иванов, денеска на проштална средба го прими амбасадорот на Кралството Шпанија, Н.Е. г. Рамон Абароа Каранс.

На средбата беа разменети мислења за севкупните билатерални односи меѓу Република Македонија и Кралството Шпанија. Двајцата соговорници се согласија дека постојат можности за натамошно интензивирање на политичкиот дијалог, и продлабочување на соработката во сферата на економијата, образованието, науката и сите сфери од заеднички интерес.

Претседателот Иванов се заблагодари за досегашната поддршка од Кралството Шпанија на планот на македонските европски и евроатланските интеграции, и изрази надеж дека истата ќе продолжи и во наредниот период.

На средбата претседателот Иванов изрази длабоко сочувство за бруталниот терористички акт во Барселона во кој животот го загубија недолжни шпански и странски државјани, истакнувајќи дека Република Македонија најостро ги осудува ваквите подли акти на насилство врз невини луѓе и изразува сочувство и солидарност со земјите кои се погодени од ваквиот грозоморени кукавички чин на тероризам.

Амбасадорот Каранс изрази задоволство од извршувањето на дипломатската должност во Република Македонија и го изрази уверувањето дека неговата земја ќе продолжи со напорите за унапредување на односите со Република Македонија.

Претседателот Иванов се заблагодари за севкупниот ангажман на амбасадорот Каранс и му посака успех во идните ангажмани.

Mnr_Katar_2
Средба со г. Солтан бин Саад Ал Мураики, државен министер за надворешни работи на Државата Катар
Среда, 02 Август 2017

Претседателот на Република Македонија, д-р Ѓорге Иванов, денеска го прими г. Солтан бин Саад Ал Мураики,  државен министер за надворешни работи на Државата Катар.

На средбата беa разменети мислења за нивото на билатералните односи меѓу двете земји, како и за можностите за интензивирање  економската соработка.

Државниот министер за надворешни работи го запозна претседателот Иванов со актуелните предизвиците со кои се соочува Државата Катар и искажа интерес за случувањата во Република Македонија.

Претседателот Иванов истакна дека Република Македонија со посебно внимание ги следи случувањата во регионот. „Се надевам дека Државата Катар и лидерите од регионот низ дијалог и со заемен ангажман на мирен начин ќе придонесат за намалување на тензиите и обезбедување на стабилност и безбедност. Потребни се мудри решенија со кои ќе се стави крај на актуелната криза", истакна македонскиот претседател.

На средбата беа разгледани можностите за економска и трговска соработка меѓу двете земји , за реализација на конкретни инвестициони проекти, како и за  потребата од натамошно унапредување на правната рамка меѓу двете земји.

Во таа насока претседателот Иванов го поздрави воспоставувањето на директната авионска линија Скопје-Доха од страна на „Катар Ервејс", и изрази очекување дека тоа ќе даде позитивен импулс за зајакнување на бизнис релациите, туризмот и културата меѓу двете земји.

 
Почеток < Пред 1 2 3 4 5 6 7 8 9 10 Следно > Крај
Страница 5 од 153