Соопштенија
italija_MO
Средба со г-а Елизабета Трента, Министер за одбрана на Италијанската Република
Понеделник, 17 Септември 2018

Претседателот на Република Македонија, д-р Ѓорге Иванов, денеска ја прими г-а Елизабета Трента, Министер за одбрана на Италијанската Република.

На средбата беше разговарано за билатералните односи меѓу Република Македонија и Италијанската Република, за соработката во областа на одбраната и безбедноста, како и за состојбите поврзани со интеграцијата на Република Македонија во Европската Унија и во НАТО.

Претседателот Иванов истакна дека македонското интегрирање во евроатлантските структури ќе придонесе за стабилност, просперитет и отвореност на целиот регион, притоа нагласувајќи ја важноста за продолжување на италијанската поддршка во однос на нашето членство во ЕУ и НАТО.

Македонскиот претседател подвлече дека Армијата на Република Македонија со својата посветеност, професионалност и високо рангирана борбена подготвеност е докажан сојузник на армиите на земјите-членки на НАТО и континуирано придонесува во заедничките меѓународни мировни мисии на Алијансата.

Претседателот Иванов се осврна и на последиците од мигрантската криза, која како што потенцираше, претставува сериозен предизвик и фактор за голема загриженост не само за нашиот регион туку и за целиот европски континент, потенцирајќи дека е потребна координирана соработка во сферите на одбраната и внатрешните работи.

„Соработката меѓу Република Македонија и Италијанската Република во сферата на заедничката безбедност особено зајакна за време на мигрантската криза и неопходно е истата да се интензивира со цел превентивно делување", порача претседателот Иванов на средбата со министерот за одбрана на Италијанската Република.

Во тој контекст двајцата соговорници разменија мислења и за состојбите со миграциските текови во Медитеранот, Блискиот Исток и Северна Африка, за нивното влијание врз континентот Европа и регионот на Балканот, како и за поведување иницијатива за заедничко учество на АРМ во воените мисии.

На средбата беше заемно констатирано дека односите меѓу двете земји се традиционално пријателски, со висок степен на разбирање и доверба, и беше изразена заедничката определба за унапредување и интензивирање на политичкиот дијалог и понатамошно динамизирање на билатералната соработка.

Matis_za_web
Средба на претседателот Иванов со секретарот за одбрана на САД, г. Џејмс Норман Матис
Понеделник, 17 Септември 2018

Претседателот на Република Македонија, д-р Ѓорге Иванов, денеска го прими секретарот за одбрана на Соединетите Американски Држави, г. Џејмс Норман Матис.

На средбата беа разменети мислења за тековните политички случувања во Република Македонија, за евроатлантските перспективи на земјата и за билатералната соработка меѓу двете земји во областа на одбраната и безбедноста.

Македонскиот претседател истакна дека пристапувањето во НАТО и ЕУ остануваат стратешки цели и највисоки приоритети на Република Македонија, што ќе придонесе за напредок и просперитет на целиот регион.

Претседателот Иванов потенцираше дека Република Македонија останува стабилен стратешки партнер на САД и дека и натаму ќе се залага за безбедноста, слободата и демократскиот напредок на регионот и активно ќе придонесува во заедничките активности во борбата против тероризмот и останатите закани на глобално ниво.

Претседателот Иванов се заблагодари за поддршката што САД ја дава на Република Македонија со цел унапредување на реформите во одбраната и безбедноста, како од аспект на финансиска, така и практична и техничка поддршка преку учество во заеднички обуки, вежби и мисии. Претседателот Иванов изрази задоволство и од соработката со Националната гарда на Вермонт.

„Иако не сме во НАТО, нашата армија е НАТО компатибилна, и за тоа сме благодарни на САД. Тоа е влог во иднината. Мораме да бидеме подготвени за новите закани и новите предизвици", порача претседателот Иванов на средбата со секретарот за одбрана на САД.

Македонскиот претседател истакна дека Армијата на Република Македонија со својата професионалност и високо рангирана борбена подготвеност е докажан партнер на НАТО и континуирано придонесува во меѓународните мировни мисии на Алијансата.

Интензивирањето и унапредувањето на севкупните билатерални односи со САД, додаде претседателот Иванов, се од долгорочен интерес за Република Македонија.

Двајцата соговорници разменија мислења и за предизвиците и очекувањата за иднината на регионот на југоисточна Европа.

PRM_Mogerini1
Средба со г-а Федерика Могерини, висок претставник на ЕУ за надворешни работи и безбедносна политика и заменик-претседател на ЕК
Четврток, 13 Септември 2018

Претседателот на Република Македонија, д-р Ѓорге Иванов, денеска ја прими г-а Федерика Могерини, висок претставник на Европската Унија за надворешни работи и безбедносна политика и заменик-претседател на Европската комисија.

На средбата беа разменети мислења за актуелната политичка состојба во Република Македонија и за процесот на европска интеграција, како и за клучните предизвици со кои се соочува регионот.

Претседателот Иванов истакна дека и понатаму ќе ги поддржува европските и евроатланските интеграции на Република Македонија кои се од огромно значење за просперитетот на државата, но истовремено порача дека стратешките цели не смеат да се злоупотребуваат на сметка на националните интереси и интересите на македонскиот народ.

- Мојот став е непроменет. Стратешка цел на Република Македонија е членство во Европската Унија и во НАТО Алијансата. Ho, ЕУ и НАТО не смеат да бидат алиби за лош договор со кој се отвораат многу повеќе прашања, одошто се затвораат, порача претседателот Иванов на средбата со г-а Могерини.

PRM_OBSE
Средба со амбасадорот Јан Петерсен, шеф на набљудувачката мисија на ОБСЕ/ОДИХР
Понеделник, 10 Септември 2018

Претседателот на Република Македонија, д-р Ѓорге Иванов, денеска го прими амбасадорот Јан Петерсен, шеф на набљудувачката мисија на ОБСЕ/ОДИХР во Република Македонија.

Двајцата соговорници разменија мислење за актуелната политичка состојба во земјава во пресрет на претстојниот референдум.

На средбата, претседателот Иванов истакна дека сите институции инволвирани во спроведување на референдумот треба безусловно да ги почитуваат законските прописи,  во согласност со достигнатите демократски придобивки и европските стандарди, водејќи сметка за државните и за интересите на граѓаните.

Шефот на набљудувачката мисија на ОБСЕ го запозна претседателот Иванов со нивните активности поврзани со референдумот. Македонскиот претседател изрази очекување дека набљудувачката мисија на ОБСЕ/ОДИХР професионално ќе ја извршува својата задача во рамките на својот строго утврден мандат.

PRM-portret
Честитки до претседателот Иванов по повод 8 Септември - Денот на независноста
Понеделник, 10 Септември 2018

По повод празникот 8 Септември, Денот на независноста на Република Македонија, до претседателот на Република Македонија, д-р Ѓорге Иванов, беа упатени писма со честитки од повеќе шефови на држави од светот.

Претседателот на Соединетите Американски Држави, г. Доналд Трамп, во името на американскиот народ упати честитка до претседателот Иванов и до македонскиот народ.

„Македонија има многу причини годинава да биде горда. Историскиот Договор од Преспа го решава долгогодишниот спор за името со Грција и го отвара патот на Македонија за членство во НАТО и во ЕУ. Договорот и членството на Македонија во НАТО ќе ги зајакнат безбедноста, стабилноста и просперитетот во целиот регион. САД се подготвени да ја поддржат Македонија, особено во претстојните разговори за Вашето членство во НАТО. Им посакувам се најдобро на граѓаните на Македонија на овој посебен ден", пишува во честитката од претседателот Трамп.

Во писмото испратено од Претседателот на Народна Република Кина, г. Си Џипинг се вели: „Во последните години, нашите две земји остваруваат стабилни билатерални односи со силна политичка меѓусебна доверба и преку продлабочување на практичната соработка во различни области".

Во честитката од Претседателот на Руската Федерација, г. Владимир Путин се вели: „Руско-македонските односи се основани на добрите традиции на културната и духовната блискост. Убеден сум дека натамошното унапредување на овие односи би им одговарало на темелните интереси на народите на нашите две земји, но и на цела Европа".

Во пораката од Кралицата на Обединетото Кралство на Велика Британија, Н.В. Елизабета ǁ се вели: „Ми претставува големо задоволство, Ваша Екселенцијо, да ви упатам најсрдечни честитки по повод прославата на Денот на независноста, со најдобри желби за среќа и просперитет на народот на Македонија во претстојната година".

Во честитката од г. Франк-Валтер Штајнмајер, претседател на Сојузна Република Германија се вели: „По повод македонскиот ден на независност, Вам и на сите Македонки и Македонци, Ви упатувам срдечни честитики и во името на моите сонародници. Цврсто сум убеден, дека Вашата земја со напредокот во владеењето на правото и доброто владеење, како и со договорите со соседните земји е на вистинскиот пат да ја создаде својата иднина во Европската унија и Северноатлантската алијанса. Со историскиот договор за прашањето за името Вашата земја докажува дека трпеливата дипломатија и доверливиот дијалог може да отворат нови перспективи дури и со оглед на најголемите предизвици. Се надеваме дека идните диксусии и понатаму ќе се одликуваат со далекувидност и одговорност. Германија и понатаму ќе ја поддржува Вашата земја на нејзиниот пат како искрен и сигурен партнер".

Во честитката од Претседателот на Унгарија, г. Јанош Адер, се вели: „Македонија од своето осамостојување постигна напредок, достоен за признание и како резултат на тоа, на дофат е членството во НАТО, како и започнување на преговори за пристапување во ЕУ. Ми претставува големо задоволство што на самитот на НАТО во јули Македонија доби официјална покана за започнување преговори за пристапување. Ве уверувам дека Унгарија и во иднина е подготвена да ја поддржува Македонија на патот кон европската интеграција".

Во честитката од Генералниот гувернер на Австралија, г. Питер Косгроув се вели: „Австралија ги цени односите со вашата земја, кои се поткрепени со силни меѓучовечки врски. Македонската зедница продолжува да биде важен придонесувач во мултикултурното општество на Австралија. Ми претставува задоволство што нашите земји продолжуваат да работат на поддршката на поредокот и меѓународната безбедност преку Глобалната коалиција против ИСИС и во Авганистан. Австралиската влада го поздравува договорот меѓу Вашата влада и Владата на Грција од јуни 2018 година за надминување на долгогодишниот спор за името. Го сметаме за значаен чекор и ги охрабруваме двете земји да работат конструктивно за имплементација на договорот".

Честитка до претседателот Иванов со желби за благосостојба на народот на Македонија, упати и Кралот на Холандија Н.В. Вилем- Александар.

Честитка по повод 8 Септември, Денот на независноста на Република Македонија, упати г. Алан Берсе, Претседател на Швајцарската Конфедерација: „Во името на Швајцарскиот федерален совет и во мое лично име, би сакал да ви упатам најсрдечни честитки на Вас, Ваша Екселенцио, по повод Денот на независноста на Република Македонија". Исто така, ви упатувам најискрени желби за добробит и просперитет на вашата земја и за ваше добро здравје и успех. Можете да бидете уверени во посветеноста на Швајцарија за развој на нашата заедничка доверба и пријателство со Република Македонија и со нетрпение очекуваме овие односи да продолжат да се развиваат во годините пред нас".

По повод Денот на независноста, честитка до претседателот Иванов упати и претседателот на Република Грција, г. Прокопис Павлопулос. „Дозволете да го изразам моето цврсто уверување и надеж дека нашите две соседни земји ќе останат на отворениот пат на билатерална соработка, со цел корист за нашите два народи. Истовремено Ве уверувам дека Грција има силен интерес за понатамошно унапредување на стабилноста, развој и добрососедски односи во регионот", стои во честитката од грчкиот претседател.

Честитка до претседателот Иванов, по повод 8 Септември упати и претседателот на Република Албанија, г. Илир Мета. „Силно влијание во јакнењето на нашите односи има и унапредувањето на меѓуетничките односи помеѓу Албанците и Македонците. Албанците во Македонија и македонската заедница во Албанија се мостот на пријателството и соработката. Во оваа прилика сакам да го изразам и моето уверување за брзо членство на Македонија во НАТО и Ве уверувам во силната поддршка од Албанија на тој пат. Тоа ќе ја зајакне улогата и позицијата на Македонија во евроатлантската ареа и ќе придонесе за безбедноста на нашиот регион", пишува претседателот Мета во честитката.

Во честитката од Претседателот на Украина, г. Петро Порошенко се вели: „Користејќи ја оваа прилика, со пријатност сакам да го истакнам задоволството од интензивирањето на украинско-македонскиот дијалог, меѓу другото во сферата на изнаоѓање на поефективни патишта за реализирање на заеднички стремежи на двете земји за интеграција во европските и евроатлантските институции. Украина е заинтересирана за понатамошен развој на меѓусебно корисната партнерска соработка меѓу нашите пријателски народи".

По повод 8 Септември, Денот на независноста, честитки до претседателот Иванов упатија и Емирот на Државата Катар, Тамим Бин Хамад Ал-тани, императорот на Јапонија, Н.В. Акихито, претседателот на Азербејџан, г. Илхам Алијев, претседателот на Казахстан, г. Нурсултан Назарбаев, како и Кралот на Кралството на Саудиска Арабија, Салман Бин Абдулазиз Ал-Сауд.

PRM_portret_01
Честитка од претседателот Иванов по повод 8 Септември - Денот на независноста на Република Македонија
Сабота, 08 Септември 2018

Претседателот на Република Македонија, д-р Ѓорге Иванов, по повод 8 Септември – Денот на независноста на Република Македонија, упати честитка до граѓаните на Република Македонија.

Почитувани граѓани на Република Македонија,

Честитајќи ви го 8 Септември - Денот на независноста на Република Македонија би сакал заедно да се потсетиме на суштината на овој голем празник.

Делото што го започнаа Илинденците а го продолжија АСНОМ-ците, конечно го заокружија македонските граѓани на 8 Септември 1991 година, на нашиот трет и конечен Илинден.

Bо очи на тој историски референдум во нашата татковина не доаѓаа високи странски претставници. Тоа беше момент на вистинска народна саморефлексија од која произлезе ненаметната, автентична и чиста волја на македонскиот народ и македонските граѓани.

Македонскиот народ на 8 септември 1991 година  го искористи своето право на самоопределување, вклучувајќи го и правото на отцепување од дотогашната заедничка држава. Со огромно мнозинство, македонските граѓани ја изразија својата волја и го дадоа својот глас со цел Република Македонија да се конституира како суверена и независна држава, со свое име и свое достоинство. Со тој чин, народот ја превзеде врз себе одговорноста за иднината на Република Македонија, без повеќе да се потпира на други. Како што македонскиот народ е создавачот на Република Македонија, така и Република Македонија е чуварот на македонскиот идентитет.

Република Македонија не може да се изградува врз други темели освен оние поставени со референдумот за независност од 8 септември 1991 година. Нашата генерација е обврзана да го зачува заветот од предците и да им го предаде на потомците. Тоа е завет за градење на Република Македонија како модерна и демократска држава во која ќе владее правото, а не луѓето, во која секој ќе биде еднаков пред словото на законот. Република Македонија како европска држава во која ќе се достигнуваат европските вредности, стандарди и критериуми.

Одлуките донесени на тој прв и единствен референдум што ја дефинираше самостојноста и сувереноста на Република Македонија беа и остануваат да бидат обврзувачки за секој еден од нас.

Нека ни е за многу години Денот на независноста на Република Македонија.

д-р Ѓорге Иванов

 
Почеток < Пред 1 2 3 4 5 6 7 8 9 10 Следно > Крај
Страница 5 од 170