Новости
Обраќање на Претседателот пред војниците од новата ротација за мисијата во Авганистан, во тетовската касарна
Петок, 08 Јануари 2010

Дозволете ми најпрвин да ви посакам среќа и успех во мисијата која ја преземате. Во име на сите граѓани на Македонија можам да Ви пренесам дека чувствуваме гордост и длабока благодарност кон Вас.

Јас сум свесен за личната жртва која секој од Вас се решил да ја поднесе. За семејните одрекувања и тешкотиите кои ве очекуваат во следните месеци. Република Македонија донесе одлука за учество во мисија во далечна земја свесна за нејзината сериозност. Но, денешните ризици јасно покажуваат дека не постои изолирано и затворено место. Македонија и самата била изложена на закани, и знае да ја цени безбедноста и сигурноста. Затоа и се решивме во оваа мисија да дадеме исклучително значаен придонес, споредено со нашата реална моќ и големина.

Македонија своето пријателство и својата припадност кон коалицијата на демократски и слободни држави ја потврдува не само на зборови, туку и на дела.

Коалицијата предводена од Соединетите Американски Држави, има сили и решителност да ја спроведе својата цел. Ние сме дел од сојуз на држави обединети меѓу себе од нашите заеднички вредности. Обединети во посветеноста кон слободата и демократијата. Тoкму затоа, поради високите цели и идеали, оваа мисија оправдано ја има широката поддршка на македонските граѓани, на политичарите и на јавноста.

Мисијата во Авганистан е правилно разбрана и во меѓународната заедница и од граѓаните на таа горда, но измачена земја. Нашите сили се во Авганистан со задача да им помогнат на граѓаните на Авганистан полесно да изградат своја демократска и слободна иднина. Земјите кои учествуваат во мисијата не бараат ништо за себе. Нашата награда е сознанието дека сме сториле се што е во наша моќ да помогнеме кога било најтешко.

Авганистан е земја со исклучително минато и богата културна и верска традиција. И Македонија има длабока и долготрајна мултикултурна традиција, на почитување и вреднување на различните вери, нации и култури. Таа традиција особено може да се види во Армијата на Република Македонија.

Затоа знам дека ќе бидете исклучително добри и достојни амбасадори на Вашата земја. Ова е можност да покажете, пред членовите на големата меѓународна коалиција, дека во Македонија војници од сите етнички и верски заедници работат заедно. Дека можеме да се потпреме едни на други и во најтешките, и во најсериозните задачи. Нашиот пример на соживот е препознаен и се вреднува од страна на нашите сојузници, како наш придонес кон решенијата за проблемите на денешниот свет.

Македонија, со учеството во мировните мисии во Ирак, Босна, Либан, и во Авганистан, покажа дека е рамноправна и интегрирана со другите земји од евро-атланското семејство на народи. Македонија е полноправен член во понесувањето на одговорностите. Ние со нашата посветеност инвестираме и во цврстината на ова глобално сојузништво, кое е замислено да трае, и кое е надеж на многу луѓе од целиот свет.

Затоа, сите сме горди на нашите војници. Вие сте тука, построени пред знамето, затоа што сте најдобрите. Вие сте најподготвените. Најуспешните. Вие сте најдобрите претставници на нашата државата, на нашите вредности и на нашата посветеност.

Претседателот Кучан на Претседателот Иванов му додели збирка на книги
Понеделник, 14 Декември 2009

Претседателот на Република Македонија д-р Ѓорге Иванов денеска се сретна со поранешниот Претседател на Република Словенија, Милан Кучан. По повод одбележувањето на денот на независноста на Република Словенија, Претседателот Кучан на Претседателот Иванов му ја додели збирката “Iconotheca Valvasoriana” составена од 17 книги што претставува најголем научен проект на Република Словенија.
На доделувањето на импозантната збирка Претседателот Иванов изрази благодарност затоа што Македонија е една од ретките земји кои што ја добиле збирката “Iconotheca Valvasoriana” - националното богатство на Република Словенија. Се заблагодари и за словенечката поддршка на Македонија во евроинтегративните процеси, како и за забрзувањето на визната либерализација. „Европа ја имаме и на нашиот простор. Ја имаме онаа Европа која пред неколку века била многу пообединета и многу посолидарна од денешна Европа. Се толерирале разликите, се почитувало она што е вредно и се складирало она што треба да остане за идните поколенија“, нагласи Претседателот Иванов.
Поранешниот словенечки Претседател Кучан посочи дека Европа ќе има иднина само ако ги признава различностите на идентитетите и културата. Претседателот Кучан потенцираше дека името, јазикот и идентитетот се суверено право на секој народ, што никој не смее да го оспорува. Европа ќе има иднина само ако ја признава различноста на идентитетите и културите, или идејата за обединета Европа ќе ја нема.
Збирката „Iconotheca Valvasoriana“, претставува колекција од европски графики од Јанез Вајкард Валвазор (1641-1693). Збирката е составена од 17 тома во големи формати и содржи 7.752 научно-критички обработени факсимили од графики и цртежи од врвни европски научници и уметници од 15, 16 и 17 век.
Збирката „Iconotheca Valvasoriana“ ќе се чува во претседателската библиотеката и ќе биде достапна за научниците работници

Изјава по одлуката на Европскиот Совет за визна либерализација
Понеделник, 30 Ноември 2009


Почитувани граѓани,

Денес е голем ден за Република Македонија. Одлуката на Европскиот Совет за визната либерализација е долго очекувано добредојде за нашите граѓани во заедницата на рамноправни и слободни граѓани на Европа.
Визната либерализација претставува огромен чекор поблиску до Европската Унија и го зголемува чувството на заедничка припадност во големото европско семејство. Европа со децении беше извор на сите напредни и демократски идеи, честопати промовирани токму со можноста за директни патувања. Затоа, со радост ја примив веста за конечното симнување на визниот режим за патување низ Европа. Сакам да им се заблагодарам на граѓаните на Република Македонија, за нивното трпение при спроведувањето на неопходните реформи, кои честопати знаеа и знаат да бидат и болни и тешки. Граѓаните покажаа длабоко разбирање дека ова се реформи кои се прават во нивен интерес, и во нивно добро.

Денешниот ден е резултат на исклучителните напори вложени за исполнување на сериозните реформи кои беа побарани од Република Македонија. Би сакал да им честитам на сите институции кои беа ангажирани за брзо и темелно спроведување на потребните мерки.

Владата на Република Македонија и сите надлежни министерства и институции покажаа дека се на ниво на високите стандарди кои беа поставени пред нив. Би сакал да им се заблагодарам и на сите претходните раководства, за нивниот придонес кон денешниот ден.
Им честитаме и на другите две држави, кои заедно со Република Македонија се изборија за овој успех. Се надевам дека наскоро и граѓаните од другите земји од нашиот регион ќе можат да патуваат слободно. Нашата администрација им се става на располагање за размена на позитивните искуства на овој пат.

Конечно, сакам да изразам задоволство што Европската Унија остана достојна на големата визија за обединет и отворен континент. Република Македонија продолжува со исполнување на реформи, со натамошно отворање на своето општество и промовирање на демократските и европски вредности. Се надевам дека, по денешниот успех, ќе продолжи вреднувањето на Република Македонија се до зацртаната цел – полноправно членство во заедницата на европски држави и народи. Сакам јасно да порачам дека Република Македонија и нејзините институции имаат и волја и капацитет и целосно се подготвени да ги отпочнат преговорите за членство во Унијата, и да ги пресретнат и да се носат со предизвиците кои ги носи овој процес.

Ви благодарам

Претседателот Иванов во Ерусалим се сретна со Премиерот Нетанјаху
Среда, 21 Октомври 2009
Претседателот Иванов се сретна со Вселенскиот патријарх Вартоломеј
Недела, 18 Октомври 2009
 
Почеток < Пред 171 172 173 174 175 Следно > Крај
Страница 175 од 175