Новости
PRM_Predavanje_Detroit_1
Претседателот Иванов одржа предавање на Државниот универзитет Вејн во Детроит
Сабота, 22 Септември 2018

Претседателот на Република Македонија, д-р Ѓорге Иванов, на почетокот на работната посета на САД, одржа предавање на престижниот Државен универзитет Вејн во Детроит.

Најавен како поддржувач на принципите на пазарната економија и политичкиот плурализам, македонскиот претседател говореше на тема: „Раѓањето на нов свет: Предизвици и можности за генерациите Y, Z и Алфа".

Зборувајќи за хиперповрзаноста, за предизвиците и можностите на новите генерации низ призмата на познатите филозофи, претседателот Иванов ги објаснуваше промените во светот, предизвикани од брзиот напредок на технологијата, миграцијата, демогафијата, климатските промени.
a
„Настапува период на пост-демократија. Тоа не е недемократија, туку демократијата ќе влезе во поинаква фаза кога ќе се види дека на неа не делуваат толку тие што ги избираат политичарите, туку спин докторите. Спин доктори се креатори на политиките, програмите и активностите на политичарите", рече претседателот Иванов.

Говорејќи за големата криза од 2008-та година и за причините поради која се случија промени, и во реалноста и во размислувањата, тој посочи дека се загубила етиката и ги охрабри младите да го искористат својот потенцијал, во ова време на хиперповрзаност во дигитално трансформиран свет. Според македонскиот претседател таквиот нов свет на sharing philosophy, block-chain технологии и старт ап бизниси, го создаваат младите дигитални генерации, преку социјалните мрежи.

„Знаењето нема смисла ако не се користи, тоа треба да има апликативна функција, да го примените тоа знаење, да ви користи во животот. Се претпоставува дека едно од тие најтајни учења е дека се што е човекова креација, се што е создадено од човек, без разлика дали е политика, спорт, војна, медицина, култура, сè подлежи на исти четири правила. Ако ги почитувате, секој пат ќе најдете решение за сè. Тие четири златни правила се состојат од четири мудрости: бидете трпелив, учете од другиот, искористете го моментот и четврто, ако сакате да успеете бидете подготвени за жртва", изјави претседателот Иванов.

Пред студентите, македонскиот претседател истакна дека е восхитен од нивната самодоверба, храброст и подготвеност, да бидат социјално активни за бројни прашања, но истовремено им порача да го канализираат уникатниот потенцијал на нивната генерација за достигнување на трајни вредности.

Државниот универзитет Вејн, основан во 1868 година, е меѓу топ 50-те американски државни универзитети за истражувачка дејност. Во рамките на овој универзитет е Мајк Илич Бизнис Школата, која го носи името во чест американскиот бизнисмен со македонско потекло г. Мајк Илич.

За време на престојот во Детроит, на претседателот Иванов ќе му биде врачена наградата Глобален државник, највисоко признание што го доделува Обединетата Македонска Дијаспора. Посетата на македонскиот претседател на САД е по повод учеството на 73. Генерално Собрание на Обединетите Нации во Њујорк, каде е предвидено да се обрати на 27 септември.

PRM_Predavanje_Detroit_3

PRM_obce_01
Средба со амбасадорот Клеменс Која, новиот шеф на мисијата на ОБСЕ во Република Македонија
Вторник, 18 Септември 2018

Претседателот на Република Македонија, д-р Ѓорге Иванов, денеска го прими амбасадорот Клеменс Која, новиот шеф на Мисијата на ОБСЕ во Република Македонија.

Претседателот Иванов, упати честитки до амбасадорот Која за неговото поставување на должноста, шеф на Мисијата на ОБСЕ во Република Македонија, посакувајќи му успех во работата.

На средбата, претседателот Иванов истакна дека Република Македонија ја цени улогата на ОБСЕ и поддршката што ја дава на македонските власти во повеќе сфери - владеење на правото, изборниот процес и законодавство, поддршка во области како што се полицијата и судството, унапредувањето на меѓуетничките односи и соживотот, во сферата на медиумите и слободата на изразување.

Во таа насока, македонскиот претседател изрази очекување дека Република Македонија и во иднина ќе ја продолжи соработката со ОБСЕ со цел поддржување на реформските процеси.

На средбата, беше разговарано и за актуелната политичка состојба во земјава и активностите на набљудувачката мисија на ОБСЕ/ОДИХР во пресрет на претстојниот референдум. Македонскиот претседател изрази очекување дека набљудувачката мисија на ОБСЕ/ОДИХР професионално ќе ја извршува својата задача во рамките на својот строго утврден мандат.

Prostalna_PRM_Bartol
Проштална средба со шефот на канцеларијата за врски на НАТО во Македонија, Горазд Бартол
Понеделник, 17 Септември 2018

Претседателот на Република Македонија, д-р Ѓорге Иванов, денеска оствари проштална средба со морнаричкиот капетан Горазд Бартол, шеф на канцеларијата за врски на НАТО во Република Македонија.

Двајцата соговорници разменија мислења за текот на реформските процеси кои Република Македонија ги спроведува во одбраната и безбедноста, а кои се целосно во согласност со НАТО препораките и стандардите.

На средбата претседателот Иванов изрази благодарност за досегашната непосредна соработка, како и подготвеност за натамошна потесна соработка и поддршка ‎од канцеларијата за врски на НАТО, во доменот на одбраната и безбедноста.‎

Македонскиот претседател на средбата порача дека членството во НАТО и Европската унија остануваат стратешки цели на Република Македонија кои се од пошироко значење за мирот, стабилноста и просперитетот на целиот регион.

Претседателот Иванов на морнаричкиот капетан Бартол му заблагодари за ангажманот во Република Македонија и му  посака успех во натамошната кариера.

PRM_medal_Pavlevski_01
Претседателот Иванов го одликува професорот Јован Павлевски со Медал за заслуги за Македонија
Вторник, 11 Септември 2018

Претседателот на Република Македонија, д-р Ѓорге Иванов, денеска го одликува Јован Павлевски со Медал за заслуги за Македонија за неговото долгогодишно промовирање на Република Македонија во Француската Република и во целиот франкофонски свет.

Медалот за заслуги се доделува на професор Јован Павлевски за исклучителната посветеност и ангажираност во своето работење и за дејствување во Француската Република, со што даде значаен придонес за унапредување на пријателските односи и на соработката со Француската Република, како и за афирмација на Република Македонија во светот.

„Неговите заслуги не се само во областа на издаваштвото. Како ангажиран интелектуалец, тој со децении се застапува и ги промовира интересите на Република Македонија во Француската Република и франкофонскиот свет. За многу франкофонски автори, творци и креатори на мислење, средбата со Павлевски е и нивна прва непосредна средба со Македонија и со македонскиот светоглед. Во него тие гледаат какви луѓе создава Македонија. И со сето тоа, професорот Павлевски стана македонскиот глас во економските и политички науки во франкофонскиот свет", истакна во обраќањето претседателот Иванов.

Професор Павлевски се заблагодари за доделеното признание од страна на претседателот Иванов.

„За мене овој медал е преважен. Како дете од Македонија, тоа е прв пат, после филмот, што добивам такво признание и сум преблагодарен. Ви благодарам од се срце. До толку повеќе што во овие моменти Вие сте еден многу голем Претседател и Вашето име, убеден сум во тоа, ќе влезе во историјата на светот. Нема да има книга по политички, социјални науки без да го има вашето име внатре", истакна во говорот пред присутните професорот Јован Павлевски.

Професор Павлевски потекнува од беровското село Ратево, а во 1960 заминува во Франција каде докторирал на Факултетот за правни и економски науки при Универзитетот во Париз.  Во својата академска кариера бил професор на Универзитетите во Руен, Казабланка и Сорбона. Тој е основач на една од петте најголемите издавачки куќи за економско-политичка литература во Европа и светот „Економика",  преку која до сега публикувале над 18.000 автори. Професорот Павлевски е носител на повеќе врвни државни и академски одликувања во Француската Република.

Kavadarci1-09092018
Претседателот Иванов во Кавадарци на манифестацијата „Тиквешки гроздобер 2018“
Недела, 09 Септември 2018

Претседателот на Република Македонија, д-р Ѓорге Иванов, со сопругата г-ѓа Маја Иванова денеска го посети Кавадарци по повод одржувањето на манифестацијата „Тиквешки гроздобер 2018".

Во рамки на посетата, претседателот Иванов оствари средба со градоначалникот на Кавадарци, г. Митко Јанчев. Претседателот Иванов ја истакна важноста што производството на квалитетно трпезно и винско грозје ја има за целиот тиквешки регион. Градоначалникот Јанчев, заблагодарувајќи за присуството на претседателот Иванов, информираше дека во Кавадарци се регистрирани над 6.500 индивидувални земјоделци што поседуваат различни површини на лозов насад.

Целта на манифестацијата е традиционално одбележување на почетокот на бербата на грозје, преку симболично откинување на првиот грозд. По повод почетокот и славењето на гроздоберот по улиците на Кавадарци беше одржано и големо карневалско дефиле.

На „Тиквешкиот гроздобер 2018" учествуваа домашни претставници како и гости од регионот, а на манифестацијата присуствуваа граѓани од цела држава, како и претставници од Владата и дипломатскиот кор во Република Македонија.

Тиквешкиот гроздобер традиционално се организира од 1964 година и претставува можност Кавадарчани покрај традицијата на одгледување на виновата лоза, да го презентираат најдоброто производството на вино и ракија од овој регион. Овој настан што истовремено претставува стопанска, туристичка и културна манифестација се совпаѓа со празнувањето на денот на ослободувањето на Кавадарци 7-ми септември.

Kavadarci2-09092018

PRM_scherbak_01
Проштална средба на претседателот Иванов со амбасадорот на Руската Федерација, Н.Е. г. Олег Шчербак
Четврток, 06 Септември 2018

Претседателот на Република Македонија, д-р Ѓорге Иванов, денеска во проштална посета го прими амбасадорот на Руската Федерација Н.Е. г. Олег Шчербак.

На  средбата Претседателот на Република Македонија му заблагодари на амбасадорот Шчербак за неговата досегашна посветеност во продлабочувањето на соработката и севкупните билатерални односи меѓу Република Македонија и Руската Федерација.

Претседателот Иванов изрази задоволство од континуираната поддршка од страна на Руската Федерација и истакна дека во духот на традицијата и пријателството, очекува односите меѓу двете земји во иднина да се зацврстуваат и унапредуваат.

Македонскиот претседател се заблагодари за долгогодишниот дипломатски ангажман на амбасадорот Шчербак и изрази задоволство од политичкиот дијалог меѓу Република Македонија и Руската Федерација и интензивираните посети и контакти на сите нивоа во изминатиов период.

Претседателот Иванов го поздрави придвижувањето на соработката меѓу двете земји во сферата на економијата  и зголеменото присуство на руските компании во Република Македонија и ја нагласи подготвеноста на Република Македонија за натамошно градење на партнерски односи со Руската Федерација во сферата на економијата и трговската размена.

Двајцата соговорници разменија мислења и за актуелните политички состојби во Република Македонија и за последните случувања во регионот и Европа.

 
Почеток < Пред 1 2 3 4 5 6 7 8 9 10 Следно > Крај
Страница 1 од 189